تعالوا نتعرف على بعض

صحيح ماتيجو نتعرف على بعض، وإيه المانع، حد عنده مانع، يعنى لو فيه مانع قولو، لعل المانع خير إن شاء الله.

ماتيجو نخالى المكان دا (أقصد المدونة) مكان كبير إن كل الشباب المصرى والعربى يتعرف على بعض فيه، يعنى كل واحد يكتب حاجة عن نفسه يعرف شخصيته وطموحاته وأحلامه اللى هى أكيد ورديه أوى وكلنا نعمل كده.

متهيئلى إن بالطريقة دى نقدر نقرب من بعض، نتعرف ونحب بعض ونقرب من بعض ( أنا بقول كلمة بعض كتير أوى، ماعلينا) .
اللى عاوز يقول رأيه أو أى حاجة فى أى حاجة يراسلنى على إيميلى وأنا هقوم بنشر رشالته لكل الأعضاء.

مفيش أحسن من الصداقة ومفيش حاجة أحسن من الحب والتفاهم والإحترام بينا.

مستنى ردودكم.

الأهـــــلى المصـــرى يواصل انتصاراته

واصل النادى الأهلى المصرى أبو فانلة حمرا المولعة المفترى إنتصاراته المدوية (كالعادة) على نادى الزمالك المصرى برضه أبو فانلة بيضا بخطين وأكد إن الأهلى أهلى واللى مش أهلى يبقى أى حاجة تانية.
ولم يرحم أحمد فتحى عبد المنصف من هز شباكه (هزينى وأنسى الدنيا) وجيه عماد متعب اللى تعبنا كتير وكان صايم عن التهديف ومخاصم الشبكة عشان يأكد الفوز ويقول للزمالك خلاص كفاية عليك كده، ماعلينا.

ولم ينجح نجم أمم افريقيا عمرو ذكى ولا نجم الزمالك المحلى شيكابالا انهم يهزو شباك الأهلى اللى اتضح أنها معمولة خرسانة مسلحة ومستوردة من الخارج عموله.

بالحضرى أو من غيره، بأبو تريكة أو برضه من غيره الأهلى هيفضل أهلى النيل رواااااه والكورة جوااه.

ألف ميروك للاهلى وعقبال البكارى ويارب الدرع يبقى اهلاوى احمراوى ولو كره أى نادى تانى.

جمعــــــة مبـــاركة

جمعتنا جمعة مباركة لكل المسلمين والعرب إن شاء الله

هــــــــام جـــــــداً

هذه المدونة لا تهتم مباشرة بالإتجاهات السياسية أو الدينية أو النظم الإقتصادية، إنما هى محاولة للبحث عن الأفضل

نحــــــو عالــم جديـــد

عنــدما فكرت فى انشاء مدونة على الإنترنت احترت كثراً فى إختيار الإسم، حيث أن الإسم سيختلف بإختلاف الهدف من إنشاء المدونة، وحيث أن الهدف الذى (وبعد تفكير عميق) أستقر فى ذهنى هو كيف ننشئ عالم جديد فى مصرنا خاصة والبلاد العربية عامة، دعونا نفكر ماهو المقصود من العالم الجديد، هل هو ضرب من الخيال؟ أم هو لعب بالألفاظ ؟
من قديم الزمان حلم بعض المفكرين (بدون ذكر أسماء) بالمدينة الفاضلة وهى المدينة الخالية من الخداع والتزييف، المدينة النظيفة شكلاً وموضوعاً، المدينة التى يشرف أى انسان أن يعيش فيها وينتسب إليها، مدينة مليئة بالحب وهيمنة الضمير، مدينة مليئة بالنور الذى يملأ جنباتها وجنبات نفوس سكانها، هل هى ضرب من الخيال ؟ أم هل هى حلم ظل يراود النفوس منذ قديم الزمان وحتى نهاية الكون؟

كل شئ بدأ بحلم، حتى الأختراعات الكبيرة التى نورت العالم وأدهشته ايضاً بدأت بحلم او نقش على جدران معبد أو فى ظلام كهف أو على لوحة مزينة بفرشاة فنان.

لماذا لا ننقش على جدران عقولنا أو نزين جنبات نفوسنا لوحة حلم عالمنا الجميل، وربما بعد صبر طال أو قصر نقوم من نومنا على أنوار عالمنا الجميل المنشود.

دعونا من هذا المكان نرسم عالمنا ونسعى إليه لتحقيقه نحن شباب مصر والعالم العربى، دعونا ننشر رسالة حب بيننا ونتعانق حتى نذوب، لقد ظلمنا العالم قديماً وأقام بيننا الحدود، فدعونا من هنا نزيل ما ترسب فينا ونتكاتف لأجل عالم جــــــــديـد.

أميـــــــــر القلــــــوب