اشترك وحقق الارباح الشهرية الكبيرة من ادارة حسابك فى فوركس

السبت، 3 يناير 2009

منتصر الزيدى أكبر تحية، شجاعة متوقعة



اكبر تحية للصحفى العراقى منتصـــــر الزيــــدى الذى شفى غليل العراقيين وكل العرب فى الرئيس الأمريكى بوش.

بالبلدى كده، أحنا بنحى الصحفى والجورنالجى منتصــــر الزيــــدى اللى فرحنا فى بوش ورماه بالصرمة القديمة ( مع أن منتصر لم يفصح عن تاريخ شراؤوة لهذا الحذاء لبيان إذا كان الحذاء جديد أم قديم).


وقد أفصحت بعض الدوائر المعنية بهذا الموضوع أن الرمية كانت فى بداية الأمر رميه حرة مباشرة أعقبها برمية أخرى غير مباشرة بثانيتين، وقد تعالت الهتافات والصرخات فى القاعة وتدافع الحرس الخاص ليكيل لمنتصر اللكمات والركلات القوية ( اللهى ينشكو فى قلوبهم قولو أمين ).


وقد أفصح مصدر مسئول فى باتا أن الحذاء كان مقاس 43 جلد فاخر بوليتان صناعة يدوية (عم نعل الصورماتى) وغير مطابق لمواصفات باتا العالمية.


بدون هزار، الراجل دا قدر يعمل حاجة كل العرب عاوزين يعملوها بس مش عارفين، تحية ليه مرة أخرى.


لقد سُجل اسم منتصر الزيدى بحروف من ذهب فى تاريخ العراق الحديث.


اللهم خفف عنه وأعينه فى عسرته.

السبت، 21 يونيو 2008

ســـــــؤال: هـل تتزوج من فتــــاة الأنــــترنت

ســـــــؤال: هـل تتزوج من فتــــاة الأنــــترنت

سؤال يطرح نفسه على كل شاب، هل تتزوج فتاة خبيرة بشئون النت ولها مشاركات سواء فى المنتديات أو من هواة التشات؟
بما أننا فى القرن الواحد والعشرين يعنى عصر الأقمار الصناعية لا لا عصر الأنترنت اللى تفوق على الفضاء والأقمار الصناعية، وبما إن كل حاجة بتتطور يوم بعد يوم، يعنى مانستغربش من أن معظم أو نسبة كبيرة من البنات بتدخل الأنترنت من حلوة ومش حلوة هههههههه، المهم لو أنت شاب هتكون إيه نظرتك لبنت بتحبها وبتموت فيها لكن هى بتدخل نت وبتشارك فى الدردشة الكتابية او الصوتية لا سمح الله انا ماقولتش كام ولا مش بكام ( هو دا بكام لو سمحت ).
- يعنى لما البنت تدخل الانترنت وتشارك فى المنتديات وتقول رأيها فى مواضيع معين تبقى بنت مش كويسة؟
- هل تسمح لأختك أو لزوجتك أو أى حرمة فى بيتك أو تخصك أنها تدخل الانترنت وتشارك زى مانت مابتشارك ؟
- لو سمحتلها بكده إيه الحدود والشروط اللى حتحطها عشان يبقى قلبك مطمن ومستريح؟
- طيب سيادتك بتشارك فى المنتديات وبتكلم بنات (استغفر الله) هتسمحلها تشارك هى كمان؟
- هتراقب دخولها ولا هتكون واثق فيها لأن الثقة مهمة طبعا؟
- هتشترط عليها تديك كلمات السر بتاعة ايميلاتها؟
- هل ظاهرة الرجل الشرقى لسه موجوده ولا موضة البنطلونات الواقعة أثرت فينا؟
- لو اكتشف أن خطيبتك بتدخل نت وبتعمل شات هتعمل ايه؟؟؟؟؟؟
الموضوع بجد محير أوى ، ياريت أشوف ردودكم الجامدة .

الأحد، 8 يونيو 2008

أعذرونى عشان مش بكتب مواضيع جديدة اليومين دول لأن عقبال عندكم أنا مطحون فى الشغل وتقريبا كده قدامى حوالى 3 سنين عشان افضى ههههههههههههههه لا طبعا دى هزره، أتمنى ليكم كل توفيق وسعادة.

الجمعة، 16 مايو 2008

قــــــــــــــدرك

قــدرك
قدرك أنك طرقت أبواب قلب
لاا يستطيع النسيان
فالذكريات محفورة على جدرانة
بكل الأطياف والألوان
نقوش ورسومات تزين أركانة
بحروف من نور
وأشعار غرام
ورسائل ممزوجة بعطور
وشجرة ورود وعش صغير لعصفور
قلوب وأسهم
وأحروف أولى
تتلألأ كالبلور
مازلت أتساءل
هل تستطيعين النسيان ؟؟
أذهبى ولا تبالى
ولا تلتفتى لوجع قلبى
أو أنين الليالى
فحبى لكى أسطورى
بل هو حب خيالى
مازلت أتساءل
هل تستطيعين النسيان
أنسينى
فحبك خالد فى قلبى
ومنقوش على الجدران
باق هو
طالما نبض القلب
وصمدت الجدران
لن أتساءل بعد الآن
لأن قلبى لايعرف سبيلاً للنسيان

الأحد، 4 مايو 2008

بلاش الوش الخشب

مفيش أحلى من انك تكون سبب فى سعادة الأخرين، ولو بابتسامة أو حتى تقول كلمة حلوة، ممكن بكلمة صغيرة تفرح قلب حزين قدامك أو بابتسامة خفيفة تترك ذكرى جميلة فى قلوب وعقول الناس، ياريت كلنا نقابل بعض بابتسامة .
مش عارف انا مكشر ليه النهاردة ههههههههههههههههههههههههههههههههههههههه.

سوبر ماركت حشش يسترك



فى يوم من ذات الأيام أتجنيت وحبيت استحمى، دخلت الحمام ولسه هبدأ لامؤاخذه أقلع هدومى لقيت مفيش شامبو ، أل يعنى كل يوم بستحمى بشامبو ونسيت صابون الشمس هههههههههههه، فكرت شوية وقولت لنفسى ياض ماتلغى موضوع الحمى دا وخليها الأسبوع الجاى، هههههههههه، وفى نفس اللحظة كنت ببص فى المراية وبنظرة اشمئناط، ايه العفانة دى، لا ياعم انا هنزل اشترى شامبو وصابون كمان، وفعلا نزلت ومانسيتش اشرب عصير قصب وانا ماشى، ودخلت سوبر ماركت متخصص فى النضافة وادوات الاستحمام وفضلة خيرك صابون وشامبو وليفة وحاجات من دى، قولت للى كان واقف بيبيع من فضلك ممكن شامبو مش عارف ايه، لقيته بصلى وعنيه حمرا زى الجوافة وقالى اوى اوى يا استاذ، راح يجيب الشامبو وانا حاسس انه ماشى مش على بعضه وكل حته ماشية لوحدها، وهو راجع بقى ومعاه الشامبو ببص فى ايده لقيته ماسك سيجارة ملفوفة ومعتبرة وعمال ينحت فيها، الله يحرقه البعيد، طبعاً بصيتله بنظرة كلها استغراب لدرجة أنه خد باله وقالى من غير ما أوجه ليه كلام " فيها ايه يا استاذ ماكل الناس بتشرب حشيش والذى منه وانا بصراحة بظبط الطاسة" لقيت نفسى عوجت بوقى ( شنكت يعنى) وبجمع ريقى عشان أتف تفه كبيرة أو أديلة 30 قفا على سهوه بس مسكت نفسى وقولتله، ألا سيادتك مش السوبر ماركت دا بتاعك ؟ قالى اه بتاعى يافندى، قولتله يعنى بتاكل منه عيش أنت وولادك يعنى المفروض تراعى ربنا وماتشربش حشيش فيه عشان ربنا يباركلك فيه، لقيته قالى منا بشرب حشيش فى المحل أحسن ما اعمل حاجة تانية، رد غريب جداً وكأن المفرض اللى عنده محل لازم يشرب فيه حشيش أو يعمل فيه حاجة تانية، وبعدين كمل كلامة وقال " أنت يا أستاذ جاى تشترى شامبو ولا جاى تفوقنى " قولتله لا ياسيدى خليك مظبط الطاسة ولا يكون عندك فكرة.
خدت الشامبو وروحت وأنا بلعن اليوم اللى قليت فيه عقلى وحبيت استحمى ، بس تعرفو أنا كنت زعلان ليه أكتر، إن البعيد اللى معندوش دم ولا احساس عمال ينحت فى سيجارة الحشيش ومعزمش عليا حتى بنفس هههههههههههههههههههههههههه الله يحرقه البعيد.
بنصح كل واحد لما يفكر فى الحمى مايروحش يجيب شامبو من بتاع الحشيش.
وبعدين قولت لازم أخد رأى واحد خبير فى الموضوع دا قومت أتصلت بالعقيد اللواء الدكتور متقاعد رئيس إدارة مكافحة تهريب ورق العنب السيد / مخيمر وسألته أيه حكاية الحشيش اللى ملى البلد وبقى بيتشرب فى اى حته دا ؟
رد عليا وقال " ياسيدى الفاضل الحشيش دا ظاهرة عالمية يعنى كل دول العالم بتظبط الطاسة، دا حتى فى هولندا بيتشرب عينى عينك ويتباع فى المحلات عادى يعنى، وأعتقد أن الطاسة العالمية محتاجة أنها تتظبط وتطير شوية فى الهوا" ( وأنا من سذاجتى بقول ليه العالم نازل ضرب فى بعضه كده )
وفى حركة غير متوقعة من السيد مخيمر لقيته حط ايده فى جيبة وطلعلى سيجارة ملفوفة وبيقولى " مساء الخييييييييييييييييييييييييييييير اضرب دماغك فى الخلاط " .
نشكر الاستاذ مخيمر على الاضافة المتظبطة على الأخر.
تمت